BACOLOD CITY — Matalunsay ukon going smoothly na ang transition sang mga opisina sa Negros Island Region kasunod sang Executive Order ni Presidente Rodrigo Duterte nga nagabungkag sa rehiyon.
Martes nga adlaw, nagpadulong sa Bacolod si DILG Undersecretary for Local Government Austere Panadero agud pangunahan ang pagsinapol sang pila ka mga opisinas kun sa diin gin-istoryahan ang sistema sang transition.
Sa bulig sang DILG suno sa Negrense nga si Panadero, nagadalagan sang matalunsay ang transition sang mga regional offices ukon ang pagbalik sang Negros Occidental sa Region 6 kag Negros Oriental sa Region 7.
Aminado ang DILG official nga indi malikawan ang pagtuhaw sang mga isyu sa transition apang mahitso gid ini bangud yara ang mga regional directors sang tagsa ka ahensya nga nagasolbar sang problema.
Isa sa mga nagtambong sa pagsinapol kahapon amo si Bacolod City Vice Mayor El Cid Familiaran.
Suno sa bise alkalde, ginhingyo nila nga himuon nalang nga sub-regional office ang mga opisina sang gobyerno nga naga-operate sa karun sa ciudad sang Bacolod.
Suno kay Familiaran, makabenepisyo ini sa mga pumuluyo bangud sa tion nga malain ang lakat ang panahon, indi makatabok sa Iloilo ang mga luyag magtransaksyon sa regional office.
Gin-athag naman ni Panadero nga depende na sa mga regional offices ang pag-anunsyar kun tubtub san-o nalang ang pagbaton nila sang mga transaksyon.
Santo sa EO ni Duterte, tubtub nalang sa Oktubre 9 ang pag-operate sang Negros Island Region.
