BACOLOD CITY — Nagalaom ang isa ka iloy nga maaktuhan ang iya reklamo matapos ang gina-alegar sexual harrasment nga ginhimo sang isa ka maestro sa Binalbagan Catholic College sa menor de edad niya nga bata.
Akig nga ginsaysay sang wala na ginhingadlan nga iloy ang gina-alegar sexual harassment sa iya karun Grade 11 nga bata kun sa diin ginatudlo nga responsable ang maestro nga si Joseph Narisma Cario.
Suno sa iloy natabo ang insidente sadtong Grade 6 pa lang ang iya bata kag bulan lang sang Noviembre sang ini ang nanugid matapos nga gin suspender sang eskwelahan ang nasambit nga maestro.
Sa panaysayon sini, apat ka beses nga gin molestiya ang iya nga bata kun sa diin ang una nga natabo sang nag-attend ini sang leadership training sa eskwelahan kag sa tent sila nagtulog kag diri siya ang ginhuliran sang iya maestro, gin tangdayan kag gin pilit nga halukan.
Sang nagreklamo ang bata pagkaaga sa principal gin hambalan lang ini nga wala lang nadala sang iya maestro ang iya “teddy bear” nga gintangdayan magtulog.
Ginsundan pa ini sang ginpapungko siya sang maestro sa iya paa kag ginhikap ang iya buli samtang nagapatigayon sang film showing sa classroom.
Ang ikatatlo nga insidente ang natabo naman matapos ang practice sa volleyball kag sang nakapauli na ang mga upod sang bata ginpatawag siya sang maestro kag ginhikap ang iya nga dughan.
Ang ikaapat nga isidente natabo naman sa camping sa eskwelahan kun sa diin samtang nagakatulog na ang tanan ginsulod naman sang maestro ang bata sa tent kag ginpauytan ang iya atubangan.
Suno sa iloy, nagpanugid lamang ang bata tinalikdan nga Noviembre 22.
Ini samtang nagapungko sila upod sa iban nga iloy samtang nagahulat man sang ila mga kabataan kag nalab-utan sang ila istorya ang maestro nga gin suspender bangud sang reklamo man sang sexual harrasment sang isa ka estudyante.
Diri kag nag-gurahab ang bata kag nanugid sa iya iloy sang tanan nga ginhimo sa iya sang iya maestro.
Nagtinguha ang Bombo Radyo nga kuhaon ang bahin sang Binalbagan Catholic College apang wala nagasabat ang mga ini.
Sa bahin sang principal nga si Catherine Brezuela nagpangako ini nga magapa-interview kahapon matapos nga gin-contact sang Huwebes apang tubtob subong wala na siya nagasabat sang tawag.
Wala man nagasabat sang ila cellphone ang mga taga-admin sang eskwelahan nga sanday Ariel Solina kag Sister Analy Garciano.
Samtang ang gina-akusar naman nga maestro ang wala man nagsabat sang ginpadal-an sang mensahe sa iya nga social media account.
Sa gihapon bukas ang Bombo Radyo Bacolod sa bahin sang Binalbagan Catholic College.
