BACOLOD CITY — Nadugangan pa ang mga nagreklamo sang sexual harassment batok sa isa ka maestro sang Binalbagan Catholic College.
Martes sang udto, ginpadangat naman sa Bombo Radyo Bacolod sang isa ka iloy ang gina-alegar nga sexual harassment nga ginhimo ni Joseph Narisma Cario batok sa iya menor de edad nga bata.
Suno sa wala na ginhingadlan nga iloy, duha ka beses nga ginmolestiya sang maestro ang iya anak kun sa diin ang una ang natabo sang Oktubre 2016 kag ang ikaduha sini nga Pebrero 2017.
Tinalikdan nga bulan sang Setyembre sang nanugid ang bata sa iloy.
Suno sa estudyante, sadtong Pebrero 2017, ginhagad siya sang iya maestro nga makuha sang tubig sa banyo kag diri ginhikap sini ang iya nga dughan kag ginhakos.
Bangud sini napilitan ang bata nga magdalagan kag naghilibion nga nanugid sa iya mga classmate apang wala sila nanugid sa mga manunudlo bangud sang tuman nga kahadlok.
Ginsundan pa ini pagkagab-i samtang nagatulog sila sa tent bangud nga may yara sang leadership training sa eskwelahan.
Ninhuliran naman siya sang maestro, ginhakos kag gintandayan.
Napilitan lang ini nga maguwa sa tent sang nakabugtaw ang mga upod sang mga bata sa tent.
Matapos nga nanugid ang bata, nagsulat ang iloy sa pamunuan sang eskwelahan kag sang Oktubre 4 naghimo ini sang complaint letter kag sang Oktubre 5 nag-atubang sila sa administrasyon.
Oktubre 30 sang nagpatigayon sang hearing ang BCC upod sa mga kabataan kag ang maestro nga nagdala man sang mga abyan nga nagdepensa sa iya.
Nagligad nga Nobyembre 10, nakabaton ang iloy sang sulat nga nagapahibalo nga sumugod Noviembre 16 mangin epektibo ang anom ka bulan nga suspension nga wala sang sweldo batok kay Cario bangud nga guilty ini sa pag-molestiya sa bata.
Nakapasaka naman sang criminal case ang iloy batok sa maestro.
Sang Sabado, isa man ka iloy ang nagreklamo batok kay Cario kun sa diin gin-alegar sini nga apat man ka beses nga gin molestiya ang iya Grade 11 nga bata.
Sa gihapon bukas ang Bombo Radyo Bacolod sa pamunuan sang BCC para sa ila nga bahin.
