Nagapanginbulahan ang alkalde sang ciudad sang Silay sa mga katapo sang Silay City Police Station kag PDEA sa madinalag-on nga operasyon batok sa amay kag mga kauturan sang ginatudlo drug lord nga si Michael Divinigracia.
Ini ang reaksiyon ni Mayor Mark Golez kasunod sang pagkadakop sang amay ni Michael nga si Felizardo Divinigracia kag mga kauturan nga sanday Kenneth kag Bryan sang ginserbehan sang searh warrant sa Brgy. Mambulac.
Nagtingob sang pwersa ang Silay City Police Station kag PDEA Negros Occidental sa operasyon batok sa mga ginakabig high value target nga mga suspetsado.
Ginpatigayon ang search operation sa duha ka balay sang mga Divinigracia nga nahamtang sa bahin sang Kalye Onse kag Zone 4 sa nasambit nga barangay.
Suno kay PDEA Negros Occidental head Grace Cruz, kapin sa 20 gramos kag ginabanta 100 mil pesos ang balor sang ginasuspetsuhan shabu ang narekober sa amay samtang kapin 15 gramos naman kag ginanbanta 75 mil pesos ang narekober kay Kenneth.
Wala naman nagbato pa ang mga Divinigracia sang gin-operate ang mga ini.
Sa karun priso na ang mga ini sa Silay City Police Station.
Madumduman nga naangot man ang ngalan ni Michael Divinigracia sang madakpan ang iya ginakabig right hand nga si Jose Alberto Pinaga kag ang live-in partner sini nga si Maebelle Belmonte sa banwa sang Dumanggas, Iloilo kun sa diin nakuha sang mga ini ang 18 milyones pesos nga balor sang shabu.
