Nagpasalig ang labor representative sa Regional Wage Board nga magaepekto na sa Hunyo 5 ang saka sa minimum wage sa Western Visayas nga P55 tubtub P110 ukon P450 para sa nagaubra sa may 11 ka empleyado pasaka kag P420 sa may 10 ka empleyado panubo.
Ini bisan pa nga nagfile na sang appeal ang management sector nga indi lang anay pag-ipatuman sang National Wages and Productivity Commission ang minimum wage hike tubtub sa Hunyo.
Suno kay Wennie Sancho, entitled ang management sector nga mag-appeal sa wage order, santo sa layi.
Ang appeal suno sa iya ang ginafile sa National Wages and Productivity Commission paagi sa Regional Tripartite Wages and Productivity Board.
Ang NWPC naman ang ginalauman nga makapapanaog sang desisyon sa sulod sang 60 ka adlaw.
Indi obligado ang mga miyembro sang Wage Board nga maghatag sang reply kundi ang legal department sang RTWPB ang masabat kun kinahanglan sang komento sang wage board.
Santo sa layi suno kay Sancho, igapatuman gihapon ang wage hike sa Hunyo 5 pending sang desisyon sa appeal.
Base sa implementing rules and regulations sang Wage Order, indi man makakuha sang temporary restraining order ukon injunction nagikan sa korte ukon iban nga entity ang management sector batok sa order nga pasakaan ang minimum wage.
Suno kay Sancho, ginarespeto nila ang appeal sang MBCCI kag hulaton nalang ang desisyon sang NWPC.
Indi magkahangawa suno sa iya ang mga mamumugon nga indi mapatuman ang wage hike sa Hunyo 5 bangud indi ini mahold in abeyance.
