Pabor ang grupo sang sugar planters sa probinsya sang Negros Occidental sa ginpagwa nga sugar order number 1 sang Sugar Regulatory Administration (SRA) nga nagaclassify sang tanan nga kalamay nga maproduce humalin Setyembre 2022 tubtob Agosto 2023 bilang Category “B” ukon pagagamiton sa domestic market.
Sa interview sang Bombo Radyo Bacolod kay United Sugar Producers Federation of the Philippines (UNIFED) President Manuel Lamata, dapat unahon sang Pilipinas ang mga Pilipino gani ginapaboran nila ang sugar order number 1 nga ginpagwa sang nasambit nga ahensya.
Suno kay Lamata, ginakulang ang supply sang locally produced nga kalamay sa Pilipinas gani indi na dapat magexport sa Estados Unidos dapat unahon ang pungsod.
Ginpahayag man sini nga dapat kun mag-import 150 000 metric tons lamang kag dapat refined sugar lang kun sa diin ang 75,000 metric tons ang ihatag sa industrial kag ang 75 000 metric tons ihatag sa merkado.
Samtang, suno kay Lamata, matapos ang galing subong nga tuig ipasurvey sang SRA ang tanan ang mga pribado nga bodega sang mga kalamay kag tanan man ang sugar centrals agud mahibaluan kun pila ang dapat nga iimport nga kalamay.
Sa pihak nga bahin, nagapati man si Lamata nga may yara sang natural resources sa Pilipinas nga himuon nga abono agud nga indi magbakal sang imported nga abono ang mga sugar planters sa pungsod.
