Handa na ang mga street cleaners sa pagsunod himos sang mga basura kadungan sang MassKara Festival nga magabukas na karon sa gab-i.
Suno kay Winna Castañeda nga nagapanglimpyo sa Bacolod public plaza, obligado sila nga magreport sa trabaho kada adlaw sa bulan sang Oktubre bangud ginalauman nga magadamo ang mga tawo kadungan sang MassKara Festival.
Suno diri, kinahanglan nga mapabilin ang kalimpyo sang plaza bangud sila man ang sukton kun wala nahimos sang maayo ang mga basura.
Ginalauman naman nga magasugod na bwas nga adlaw ang operation sang mga kiosko sa palibot sang public plaza.
Nagalaom naman ini nga tipunon lang ang basura kag indi paglaptahon bangud indi ini maayo lantawon kag sila nalang ang bahala sa pagkolekta.
Ginaplano naman nga magadugang sang street cleaners sa plaza bangud kinahanglan nga madasig ang paghimos sang basura.
Mangin bastante naman ang ila nga pagkaon bangud libre lang ini kun MassKara Festival.
Suno kay Castañeda, antes ang MassKara Festival, nagaduty ini adlaw-adlaw sugod alas-6:00 sa aga tubtub alas-8:00 sa aga kun sa diin matapos na sini limpyo ang ila area kag nagabalik naman pagkahapon.
Sa iya pagkahibalo, 36 sila kabilog nga nagalimpyo sa palibot sang plaza kag malapit nga mga dalan.
Nagahingyo naman ini sa mga bisita nga ibutang ang basura sa basurahan kag indi paglaptahon bangud indi ini maayo tulukon.
