Nangin madinalag-on ang pagsaulog sang opening salvo sang Masskara Festival sang Biyernes sang gab-i suno sa spokesperson sang Bacolod City Police Office (BCPO).
Sa interview sang Bombo Radyo Bacolod kay Police Lt. Col. Sherlock Gabana, successful ang pagpatigayon sang opening salvo sang Masskara Festival sang Biyernes sang gab-i.
Suno kay Gabana, ini bangud sa kooperasyon sang mga pumuluyo kasubong man sa ahensya sang gobyerno nga nagpakigbahin man sa opening salvo sa nasambit nga lugar.
Ginpahayag man sini nga may yara man sang gindeploy nga mga personnel agud magbantay kag magpatuman sang NO SMOKING ukon VAPING ilabi na sa lugar nga ginahiwatan sang event sang Masskara.
Suno kay Gabana, ginasaway lamang ang makita nga nagapanigarilyo apang kun indi ini magpati sa liwat nga pagsaway sang mga otoridad, arestuhon na ini bangud sa disobedience to authority.
Ginpahayag man sini nga ginadumilian ang pagdala sang patalom, pusil kag wala man gina-engganyo ang pagdala sang malahalon nga pagkabutang sa tion nga maglagaw sa Masskara Festival agud malikawan ang insidente sa pagpangawat.
Panawagan man ni Gabana sa publiko nga magsunod lamang sa mga pagsulundan agud nga mangin malinong kag matawhay ang pagsaulog sa Masskara Festival 2022.
