Pilason ang onse ka mga kapulisan nga katapo sang 604th company sang Regional Mobile Force Battalion 6 matapos nga maaksidente ang ginasakyan nga JMC Troop Carrier sa National Road, , Purok 1, Barangay Caningay, Candoni, Negros Occidental kaina alas 11:00 ang takna sang aga.
Ang mga pilason ang ginkilala nga sanday Patrolman Jerome Tolentino; Patrolman Joey Bana-ag; .Patrolman Eric Abela; Patrolman Bryan Ambajan; Patrolman Immam James Apucay; Jared King Dadivas; Police Corporal Mark Jel Salazar; Police Corporal John Arevalo; Police Corporal Reggie Tacdoro; Police Corporal Noriel Vergara; Police Corporal Kenneth Valiao.
Sa interview sang Bombo Radyo Bacolod kay Police Major Ruel Culanag, hepe sang Candoni Municipal Police Station, sa inisyal nga imbestigasyon samtang nagapatigayon sang routinary road patrol ang personnel nagikan sa 604th company sang Regional Mobile Force Battalion 6 nga nagasakay sa JMC Troop Carrier nga ginadrive ni Patrolman Emam James Apucay kag ginausoy ang dalan sa Brgy Caningay, Candoni padulong sa Candoni proper kag nag-abot sa kurbada nga bahin sang nasambit nga national road nadulaan sang kontrol nagamaneho sang salakyan sa diin nagluntad ang insidente.
Ang mga nasamaran ang gindala sa Candoni Rural Health Unit agud madapatan sang nagakaigo nga pagbulong.
Walo ang gindapatan sang first aid samtang tatlo naman ang gindala sa ospital.
