Aminado ang Department of Social Services and Development nga nagdagsa naman ang mga Badjao diri sa ciudad sang Bacolod subong nga bulan sang Disyembre.
Suno kay DSSD head Pacita Tero, naghatag siya sang instruction sa Mendicancy Team nga lantawon ang vaccination card sang mga badjao agud nga mahibaluan kun legitimate ang mga ini.
May yara na kuntani sang hingyo ang DSSD sa Philippine Coast Guard nga indi sila pagpasakyon sa barko halin sa Mindanao.
Sang damlag lang, isa ka grupo sang mga badjao ang gindul-ong sa Mindanao apang nakit-an ang pila sa mga ini nga liwat naman nga nagbalik diri sa Bacolod.
Nagpanindugan si Tero nga indi dapat magtinir ang mga badjao diri sa Bacolod bangud madamo man ang taga-Bacolod nga dapat buligan.
Suno kay Tero, dapat nga mahimo ang national government sang tikang agud nga mahatagan sang atensyon ang problema sa mga badjao.
Sa nauna nga interview sa mga Badjao nga gindul-ong sa Mindanao, ila ginpahayag nga indi mabuhi sa ila dutang natawhan gani kinahanglan nila magkadto sa iban nga ciudad.
Suno sa DSSD head, dapat nga mahimo man sang tikang ang Bangsamoro Autonomous Region in Muslim Mindanao agud nga mabuligan ang mga badjao nga indi na magsaylo-saylo sang lugar.
Suno kay Tero, lain ang kultura kag tradisyon sang mga badjao sa lugar nga ila ginhalinan gani mahimo nga madiscriminate ang mga ini kun isimpon sa iban nga mga pumuluyo.
Dapat nga paintindihon ang mga ini suno kay Tero nga ang nagatrabaho lang pagwaon kag ibilin ang ila nga mga kabataan bangud kun indi sila magsunod, mapilitan ang city government nga magpatuman sang pagsulundan nga sila man gihapon ang mabudlayan.
