Sa ikaanom nga adlaw sang Misa de Aguinaldo, ang tema ang nakasentro sa pagkatinugyanan sang Simbahan sang mga kubos ukon “Stewardship and the Church of the Poor”.
Sa homiliya ni Reverend Father Rafael Baja sang Triumph of the Holy Cross Parish, gin-athag sini ang rasun kun ngaa dako ang pag-ulikid sang simbahan sa mga imol.
Ini bangod ang mga imol ang makaluluoy, wala sang ikasarang, defenseless gani sila ang gina-ulikid kag ginabuligan sang simbahan.
Dugang pa ni Fr Baja nga ang second Diocesan Synod ang nagapahayag nga wala sang imol nga mapatay nga indi mamisahan, wala sang imol nga magapakasal sa simbahan nga indi makasal, wala sang imol nga magapabunyag sang bata nga indi makapabunyag.
Apang pahanumdom sini nga indi dapat maglain ang buot sang indi imol ukon may ikasarang, bangod ang simbahan ang para sa tanan kag wala sang pinilian.
Ang preferential option sang simbahan para sa mga imol ang ginpaanggid lamang ni Fr Baja sa isa ka iloy nga may lima ka kabataan apang nagamasakit ang isa.
Paathag sini nga palarehas ang pagpalangga sang iloy apang mas paga-ulikdan sini ang nagamasakit nga bata, nga kaangay man sa pagtratar sa mga imol.
Dugang pa sini nga bisan ang Ginoo, nga isa ka hari kag makagagahom sa tanan ang ginpili nga mabuhi bilang tawo, magpuyo bilang imol kag makabatyag sang kabudlayan kag kasakit bangod ang imol ang may-ara sang lugar sa tagipusuon sang Ginoo.
Suno kay Fr. Baja, kita tanan ang ginahangkat man nga magpatubo sang pagpalangga ilabi na sa mga kubos.
Dugang pa sini nga bisan ang imol ang sarang makahatag sa labing kubos bangod ang pagkaalawan ang wala lang nakabasi sa pagkamanggaranon kundi sa panimuot.
Panawagan ni Fr. Baja nga patubuon sang tagsa ka tawo ang panimuot nga maayo kag maalwan agud nga ang Paskwa ang magdala pa sa atun sa pagbisita sa labing kubos natun nga mga kauturan.
Ginapangabay sini nga ang pagbisita natun sa imol ang makadala sang kabuhi kag kalipay.
Samtang ginpahanumdom man sini nga indi dapat i-underestimate ang paghigugma sang Diyos sa tawo ilabi na sa imol.
Ini bangod ang paghigugma sang Diyos ang tuman ka dalom kag wala sang makatakos samtang ang milagro nga mahimo buhaton sini sa atun kabuhi ang nakadepende naman sa kadalumon sang atun pagtoo.
Gani panawagan sini nga magsalig kag magtuo lamang bangod ang paghigugma sang Diyos ang nagapadayun.
Dugang pa nga pangabay ni Fr Baja nga kita ang ma-inspire sa Diyos kag atun man nga bisitahan ang mga pigado sa kumunidad kag pinaagi sini kita ang magatubo kag magahamtong man sa grasya sang Diyos.
