Nangin generally peaceful ang pagpatigayon sang Sinulog Festival sa syudad sang Kabankalan suno sa spokesperson sang Negros Occidental Police Provincial Office (NOCPPO) kag ginkumpirmar man sini nga nagpadala man ang NOCPPO sang mga kapulisan sa Panay para sa augmentation sa pagpabilin sang seguridad sa pagsaulog sang Ati-Atihan Festival sa Kalibo, Aklan kag Dinagyang Festival sa syudad sang Iloilo.
Sa interview sang Bombo Radyo Bacolod kay Police Captain Judesses Catalogo, nagpadala sang 512 ka mga kapulisan sa Aklan para sa Ati-Atihan Festival kag 100 naman sa syudad sang Iloilo para sa Dinagyang Festival.
Suno kay Catalogo, overwhelming ang augmentation sang mga kapulisan bangud magluwas sa mga festivals sa Panay may yara man sang festival nga ginapatigayon sa probinsya nga ginalakipan sang Sinulog Festival sa syudad sang Kabankalan kag Dinagsa Festival sa syudad sang Cadiz.
Suno diri, may yara naman ang NOCPPO sang naplastar nga security plan para sa deployment sang mga police personnel sa mga major public gatherings agud masiguro ang seguridad.
Nagpahanumdom man ini sa mga pumuluyo nga kun magpadulong sa mga matawo nga lugar nga ginadumilian ang pagdala sa mga matalum nga bagay.
Dugang pa sini nga mangin responsible ang mga ginikanan sa mga ginadala nga mga kabataan ilabi sa pagtambong sa mga festivals.
