Nagadangat sa P1 million ang ginagastos para sa pagkaon sang mga evacuees tuga ang pag-alburuto sang Bulkan Kanlaon, nga yara sa evacuation centers.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, 10,000 ang mga palakan-on kalakip na ang evacuees, volunteers, peace keeping force kaangay sang kapulisan kag militar kasubong man ang mga barangay kag municipal employees.
Suno kay Diaz, kapin P500,000 ang magastos sa panyaga kasubong man sa panyapon kun sa diin tig isa ka tonelada nga manok ukon baboy ang ila ginapareparar kada adlaw.
Pasalig sini nga luyag sang Provincial Government nga mahatag ang husto nga nutrisyon sa mga pagkaon nga mabatun sang mga evacuees.
Aminado si Diaz nga halos wala na sang magamit nga resources ang apektado nga local government units, apang pasalig ni Negros Occidental Governor Eugenio Jose “Bong” Lacson nga plastado na ang supply para sa 14 ka adlaw.
Kay sila ang may pang-14 days pa nga pondo gani maseguro nga may nagakaigo nga makaon ang mga evacuees sa sulod sang isa ka bulan.
Ginapakamaayo man ni Diaz ang menu nga ginapreparar sang Mambukal catering services bangod ini ang indi sulit-sulit samtang sila ang nagpangita na lamang sang magaserbe nga cook sa tagsa ka evacuation area.
Suno kay Diaz, ini ang mas maayo bangod maka-income man ang pila ka mga ginikanan.
Mainit man ang nangin pagbatun sang mga evacuees sang sila ang ginbisitahan ni Governor Lacson bangod sa nabatyagan nila nga pagsuporta.
