Nagpositibo sa paraffin test si anay Punong Barangay Federico “Bimboy” Gayagas Jr. sang Barangay Bacong, Bago City; samtang negatibo naman ang iya live in partner nga si Carmelita Davila.
Madumduman nga napatay ang duha matapos ang shooting incident samtang yara sa sulod sang salakyan sa Bangga Tomaro, Brgy. Sum-ag, Bacolod City sang Marso 7.
Dead on the spot si Carmelita samtang kasunod nga adlaw, ginbawian man sang kabuhi sa ospital ang anay Punong Barangay.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, walo ka entrance kag tatlo ka exit wounds ang nakita kay Carmelita.
Ini ang ginalakipan sang lima sa kilid, duha sa kamot kag isa sa nawala nga bahin sang likod.
Samtang si Bimboy, ang may isa naman nga igo sang bala sa natuo nga agtang nga naglapos sa nawala.
Santo sa narecover nga CCTV footage, nakita nga inanay pa nga nagpark sa higad ang salakyan kag ini ang nakahandbreak naman kag nakaneutral ang kambyada.
Suno diri scattered ang igo sang ginabanta kapin 30 nga bala sa salakyan nga nagdangat pa sa atop, gani ginalantaw nga nag-agaway pa sang cal. 9mm pistol ang maglive-in antes natiruhan si Carmelita.
Kasunod sini, amo na ang pagpahigad sang salakyan kag didto naman nag-utas sang kabuhi si Bimboy.
Bisan ang pamilya ni Carmelita ang nag-ako nga tuman kun mag-away ang duha kag grabe ang inaway sang mga ini antes paman magbyahe sang Marso 7.
Sa ila impormasyon, luyag na nga makigbulag ni Carmelita sa anay Punong Barangay, nga rasun man kun ngaa yara sa salakyan ang mga panapton sini.
Ang cal. 9mm pistol ang lisensyado nga armas ni Bimboy, samtang duha lamang ka serial number ang maathagan sa M16 rifle gani indi pa matumod kun kay sin-o narehistro samtang wala man nahibaluan kun diin sini nakuha ang grenade launcher.
Suno kay Ofalia, ginraid na sadto ang balay ni Bimboy sa Bago City kag nakakuha sang madamo nga armas, na-involved naman ini sa shooting incident sa nasambitan nga ciudad kag ang ulihi amo ang shooting incident sa Bacolod Police Station 6 kun sa diin isa ini sa mga natiruhan.
