Patay ang anay Punong Barangay matapos ginluthang samtang nagasakay sa depasahero nga jeep sa Brgy. Patun-an, Calatrava, Negros Occidental, kahapon, alas-8:40 sang aga.
Sa interview sang Bombo Radyo Bacolod kay Police Major Wilfredo Benoman Jr., hepe sang Calatrava Municipal Police Station, nagasakay sa jeep si Amalia Gelardes, 64, anyos, kasado, land-owner kag residente sang Brgy Suba, Calatrava, samtang may katupad man ini sa jeep nga amo si Clint Jay Bacheller, 19 anyos, mangunguma, kag residente sang Barangay Macasilao, Calatrava.
Suno diri, ang jeep nagabyahe padulong sa ciudad sang San Carlos apang nag-untat ini sa bahin sang Brgy Patun-an.
Duha ka suspek ang nakit-an kun sa diin nagsaka ang isa sa jeep kag gintiro sang pila ka beses si Gelardes samtang nasalabat naman si Bacheller.
Gindala sa ospital ang duha ka biktima apang gindeklarar nga dead on arrival si Gelardes samtang si Bacheller naman ang yara na sa estable nga kondisyon.
May narekober naman nga duha ka fired cartridges sang 9MM kag isa ka deformed fired bullet.
