Ginpatpat sang Election Officer sa ciudad sang Bacolod ang mga pagsulondan sa pag-umpisa sang local campaign period.
Sa interview sang Bombo Radyo Bacolod kay Atty Revo Sorbito, ang local campaign period ang nag-umpisa alas-12:01 kaina sang kaagahon.
Suno diri, sila ang magapatigayon man sang nationwide oplan baklas bilog nga adlaw kaupod ang Local Government Unit.
Gin-athag man sini nga wala sila sang ginapili sa kun kay sin-o ang kakason nga campaign material nga yara sa gwa sang designated common poster areas.
Gina-abisohan man sini ang tanan nga kandidato nga likawan ang pagpanagtag sang mga butang kaangay sang ballpen, lighter, tshirt, kuyab, pagkaon kag iban pa nga makonsiderar nga vote buying.
Sila ang magamonitor man sa campaign activites para maregulate ang mga kandidato kag kun may makita man nga paglapas sa layi sang COMELEC, sila ang mahimo nga makapropose sang pag-aresto.
Nagpanawagan man ini sa mga candidates nga mangin responsable sa ila mga supporters kay kun kaisa wala man sang bayolasyon ang kandidato apang ang mga supporters lang ang nagapa-intense sa sitwasyon.
Pahayag ni Sorbito, magkampanya lamang para sa kaugalingon kag indi magpangguba ukon maghambal sang malain sa iban kag likawan ang personal issue sang kontra apang magfocus lang sa achievements kag plano para sa ciudad.
Samtang, sa karun may yara na sang 356, 814 ka mga registered voters sa ciudad sang Bacolod.
