Ginpanawagan sang officer in charge sang Bacolod Traffic and Transport Management Department sa mga unconsolidated traditional jeepney drivers and operators nga mag-upod sa gobyerno, kasunod sang ginhatag nga oportunidad.
Sa interview sang Bombo Radyo Bacolod kay Patrick Leonard Lacson, maayo nga balita para sa mga wala nagpaconsolidate ang pag-anunsyar ni Department of Transportation (DOTr) Secretary Vince Dizon nga hatagan sini sang tyansa nga mangin legal ang wala nakapaconsolidate matapos ang Semana Santa.
Ini bangod ginakonsiderar man sang tiglikom ang ila palangabuhian.
Apang sa baylo, pangabay ni Lacson nga magkooperar man ang mga gintawag sini nga illegal jeepney drivers and operators sa gobyerno kag mag-upod sa liwat nga pagbukas sang consolidation process.
Pinaagi sini, sila ang mahatagan sang provisional authority sang Land Transportation Franchising and Regulatory Board (LTFRB), makakwa sang OR/CR sa Land Transportation Office (LTO), makapa-emission test agud malimpyuhan ang mga aso sang tambutso kag mahatagan sang accident insurance.
Samtang panawagan naman ni Lacson sa mga pasahero nga kun magsakay sa jeep, pilion ang may BTTMD sticker, bangod ang mga ini ang nacheck na kay may-ara sang accident insurance.
