Natalana nga ipanagtag sang Department of Agriculture ang P1 billion nga balor sang mga baboy sa mga dalagko nga uma sa bilog nga pungsod sa tinutuyo nga mabalik ang hog population sa lebel sini antes ang African Swine Fever.
Sa isa ka statement nga ginpagwa sang ahensya kahapon, ginpahayag sang DA nga 30,000 nga mga baktin ang ihatag sa large-scale farms, nga magabayad sa gobyerno pinaagi sa pag-suplay sang baboy nga amo ang ipanagtag naman sa backyard farmers.
Gin-enganyo naman ni Agriculture Secretary Francisco Tiu-Laurel Jr. ang swine industry nga suportahan ang tatlo ka tuig nga inisyatibo nga naga-target nga mapasaka sa 78 percent sa 2028 ang inventory nga ginabanta yara sa 8 million heads.
Gin-anunsiyar man sang DA ang agreement sa industry stakeholders agud nga pabaskugon ang pagpatuman sang maximum suggested retail price para sa baboy.
