Nakahaya na ang bangkay sang duha ka kabataan nga napatay sa pagkasunog sang balay sa Purok Lison, Barangay 1, Bacolod City sang Mayo 20.
Madumduman nga napatay sa sunog ang mag-utod nga anom ka tuig kag walo ka tuig sa sunog, nga ginalantaw tuga sang ginsindihan nga kandila bangod sa brownout.
Wala naman sa balay ang iloy, matapos nga ini ang nagbakal sang fastfood nga request sang ginagutom sini nga kabataan.
Sa interview sang Bombo Radyo Bacolod kay Punong Barangay Cesar Rellos, nagahatag sang P16,000 nga bulig ang Barangay, ginaproseso naman nila ang bulig gikan sa Department of Social Service Development, nagpadulong naman sa lugar ang mga personnel ni Mayor-elect Greg Gasataya agud maghatag sang bulig, kag asikasuhon man sini ang assistance gikan sa Office of the City Mayor.
Naghatag man sang bugas ang Office of the Vice President, kag ini ang ginhatag sang iloy sang mga kabataan sa ila nga lolo nga nakaangkon man sang 3rd degree burns sa pagtinguha kuntani nga masalbar ang iya mga apo.
Suno kay Rellos, may mga pribado nga indibidwal man nga nagacontact sa iloy agud maghatag sang bulig, apang nagaduhaduha ini sa pagbatun sang kwarta, bangod nagasakit ang iya balatyagon.
Pahayag ni Rellos nga gin-isa na lamang ang lungon sang duha ka kabataan, kag gintupad na lamang ang agot nga natam-an sa sunog sa lawas sang iya manong.
Ang mga bangkay ang sa karun nakahaya sa chapel sang Purok Lison, Barangay 1, Bacolod City.
May impormasyon ang Punong Barangay, nga luyag sang iloy nga sa Barangay Villamonte na lamang iyaha ang mga kabataan bangod indi sini mabatas nga sa ila balay.
Sa inisyal, ang ginhatag nga tentative date sang lubong ang sa maabot nga Miyerkules, Mayo 28.
Sa pihak nga bahin, nagpinsar naman ang amay sang kabataan nga kaupod sa nasunog ang iloy rasun nga ini ang halos indi ma-estorya sang tinalikdan.
Pahayag ni Rellos, nga sang magpalapit ang iloy, madasig ini nga ginhakos sang amay sang mga bata kag mabaskog nga naghilibion.
Maayo naman nga nakasugilanon ang duha ka ginikanan.
