Nagpadala sang sulat si Negros Occidental Governor Eugenio Jose ‘Bong’ Lacson kay Department of Environment and Natural Resources (DENR) Secretary Raphael Perpetuo Lotilla angot sa pag-operar sang Hacienda Asia Plantations Incorporated (HAPI) sa banwa sang Candoni.
Tubtob sa karun wala nakasecure sang Environmental Compliance Certificate (ECC) ang HAPI apisar nga ginhambalan na ini nga iproseso ang nagaka-igo nga dokumento antes ang ila operasyon.
Bangod sini, nagsulat si Lacson sa DENR sa pagpanugyan nga magpatunga ang ahensya sa problema sang banwa kun sa diin 6,652 ka ektarya sang kagulangan kag kahilamonan sang brgy Gatuslao, Agboy, kag Payuan ang gamiton bilang palm oil plantation.
Apektado ang kapin sa 4,000 ka ektarya sang duta ang gina-istaran sang Indigenous Peoples (IP) kag kapin sa 1,000 ka pamilya ang magapangatubang sang displacement sa expansion sang plantation.
Pahayag sang gobernador, nagpanugyan ini kay Lotilla nga kun tani mapadasig ang pagsolbar sa problema samtang nag-issue na sang cease and desist order ang Provincial Environment Management Office batok sa palm oil plantation.
