Ipatawag sang Bacolod City Government ang Environment Management Bureau-Negros Island Region (EMB-NIR) para sa technical conference subong nga adlaw, Agosto 12.
Ini agud nga ipaathag ang rason sang pag-issue sang Environmental Compliance Certificate (ECC) sa isa ka propiedad nga gin-develop sa Buri Road, Barangay Mandalagan, Bacolod City.
Sa interview kay Bacolod City Legal Officer Atty. Karol Joseph Chiu, may yara sang luyag nga klaruhon ang ciudad natuhoy sa pagkutkot ukon pag-excavate, pag-transport kag pag-dispose sang basura sa daan nga dumpsite.
Ang old dumpsite ang ginahabuyan sang basura sang 2004 apang gindagdagan sang closure order sang Ombudsman sang 2005 rason nga ginsaylo sa Barangay Felisa ang paghaboy sang basura.
Ang nasambit nga dump site ang madugay na nga ginsirado, kag dapat matapos ang closure ini ang i-rehabilitate agud nga magamit liwat.
Apang base sa makita sa karun, ang basura ang nagatumpok sa gihapon nga natalupangdan humalin pa sang nakaligad nga tinuig.
Ang mga basura gikan sa old dumpsite man ang sadto gingamit sa backfilling sa Barangay SUM-AG kag Barangay Punta Taytay sang Abril 2025, nga nangin issue man sadto.
Pamangkot ni Chiu kung nakahibalo na ang EMB nga ang lugar ang daan nga dumpsite kag ngaa ginhatagan ini sang ECC apisar nga delikado sa ikaayong lawas sang mga residente.
Suno kay Chiu, Hulyo 2025 sang gin-issue sang EMB ang ECC sa private property nga ginahamtangan sang old dumpsite.
Suno pa sa City Legal Officer ginbutang sang EMB sa alang-alang ang ciudad kag dapat buligan sila sang nasambit nga ahensya sa pag-dispose sang residual waste halin sa daan nga dumpsite.
