Posible nga makatuga sang katalagman sa mga empleyado kag pumuluyo ang padayon nga paggamit sang Cell no. 4 sa Bacolod Sanitary Landfill.
Madumduman nga ginkumpirmar ni Bacolod City Administrator kag temporaryo nga nagapungko bilang pinuno sang Bacolod Environment and Natural Resources Office (BENRO) Atty. Mark Steven Mayo, nga ang Cell no.5 sa Bacolod Sanitary Landfill ang ginagamit na apisar nga wala pa sang Environmental Compliance Certificate (ECC) gikan sa Environmental Management Bureau.
Sa interview sang Bombo Radyo kay Bacolod City Councilor Homer Bais, Chairperson sang Committee on Environment and Ecology sa Sangguniang Panlungsod, ginpahayag sini nga wala sang choice ang ciudad bangud kun padayunon sa gihapon ang paghabuy sang basura sa Cell no 4 posible nga ini ang mag-collapse kag makatuga sang risgo sa mga empleyado kag sa ikaayung lawas sang mga pumuluyo malapit sa lugar.
Ini bangud indi naman ini malab-ot sa pagbutang sang duta nga posible magresulta sa pagsungaw sang baho sang basura.
Dugang pa sini, isa ka tuig kag tatlo ka bulan lamang ang paggamit sa Cell No. 4 kag kun maglapaw sa limit posible nga ini ang magcollapse.
Gani, paathag sang Konsehal nga win win situation ang nangin desisyon sang ciudad nga gamiton nalang ang Cell No. 5.
Pahayag ni Bais, malapit nalang matapos ang pagproseso sang mga dokumento kag nagpasalig nga wala nagapabaya ang ciudad agud nga makompleto ang tanan nga environmental compliances.
