May persons of Interest na ang Toboso Municipal Police Station sa nagtiro-patay sa duha ka mga lalaki sa Sitio Stop Aguinaldo, Barangay San Isidro, Toboso, Negros Occidental kahapon sang aga.
Ginkilala ang mga biktima nga sanday Elias Palay kag Joebert Alonsado.
Sa interview sang Bombo Radyo Bacolod kay Police Captain Rene Boy Eduardo, Deputy Chief of Police sang Toboso Municipal Police Station, santo sa mga alas-8:20 ang takna kahapon sang aga samtang nagapungko sa iya ginabaligyaan sang uga si Elias Palay ginpalapitan sang isa ka lalaki nga nakabonnet kag wala sang madamo nga estorya gintiro ini sang makapila ka beses gamit ang wala pa matumod nga calibre sang armas-luthang.
Ang biktima ang nakaagom sang igo sang bala sa nagkalain-lain nga bahin sang lawas sini.
Matapos ang insidente gintuyo sang suspek nga magpalagyo apang nakita ini ni Alyas Putot kag gintuyo pa nga tiruhon sang dala sini nga pistola apang naunahan ini sang suspek sa pagtiro sang makapila ka beses kun sa diin siya ang nakaagom sang samad sa pila ka bahin sang iya lawas.
Suno kay Eduardo, nagapadayon pa ang ila imbestigasyon kag ginahibalo pa sa karun kun ano gid ang ginhalinan nga nagresulta sa pagtiro-patay sa duha ka mga biktima.
Si Joebert ang utod sang police nga nakadestino man sa Toboso.
Apat ka suspek ang ginalantaw nga may kahimuan sang krimen.
Ginaimbestigaran man sa karun ang background sa mga biktima kag ginahibalo pa ang motibo sa pagpatay sa mga ini.
