Nagpasalig si President Ferdinand ‘Bongbong’ Marcos Jr. sa publiko nga nagahimo sang tikang ang gobyerno agud masiguro ang safety kag repatriation sang mga Filipino sa Israel kag Iran matapos ang escalation sang konflikto sa Middle East.
Sa isa ka recorded message, ginpahayag ni Marcos nga ginpasaka na sang gobyerno ang duha ka pungsod sa Alert Level 3 nga naga-activate sang voluntary repatriation program.
Suno kay Marcos, yara sa karun si Department of Migrant Workers Secretary Hans Leo Cacdac sa Amman, Jordan agud magbaton sang una nga batch sang 26 ka mga repatriates nagikan sa Israel sa King Hussein Crossing.
Suno diri, ginaproseso sa karun sang gobyerno ang masobra 200 repatriation requests kag nagahimo sang mga tikang agud mafacilitate ang ila pagbalik.
Sa Iran, ginapreparahan sang Philippine Embassy ang pagpauli sang initial batch sang walo ka mga Filipinos.
Nagpasalig naman si Marcos sa publiko nga yara sa full alert ang gobyerno agud protektahan ang mga Filipino sa luwas sang pungsod.
