Personal nga ginsaksihan ni Bacolod City Mayor Greg Gasataya ang pagflushing sa Libertad Public Market kagab-i.
Sa bulig sang Bureau of Fire Protection nagpatigayon sang flushing sa nasambit nga merkado.
Sa interview sang Bombo Radyo Bacolod kay Mayor Greg, sa idalom sang City Administrators Office, Bacolod Environment Natural Resources Office (BENRO) kag iban pa ang nag-umpisa na sila sang ila nga flushing activities sa merkado.
Suno kay Gasataya, una ini nga ginpatigayon sa Libertad Public Market kag karun sa gab-i sa Burgos Public Market kag ang madason amo ang yara sa Central Public Market.
Inisyal nga plano ang patigayunon once a month kag panilagan kun ano ang sitwasyon kag kun kinahanglanon nga patigayunon ini twice a month himuon ini sang ciudad.
Suno sa alkalde ini na ang mangin regular nga aktibidad sang ciudad sa mga dalagko nga merkado.
Suno diri may mga dalagko nga mga kinahanglanon ang merkado apang wala na nila ginhulat nga mahuman bangud gin-umpisahan na sang ciudad ang pagpanglimpyo nga mahimo man gilayon.
Ang katuyuan sini amo nga masiguro ang up keep sang mga merkado bangud ini ang basic nga ginakadtuan sang mga tawo adlaw-adlaw.
Kaangay lamang sang antes nga pagflushing nga kadanlog kun sa diin risgo sa mga nagapadulong sa merkado kag sa bulig sang Bureau of Fire Protection kag Primewater nagtinlo na ini.
Nagapasalamat ang alkalde sa tanan nga nagfacilitate nga mapatigayon ang flushing activity.
Nagapanawagan man ini sa mga pumuluyo nga magbinuligay sa pagpabilin sang katinlo sang merkado paagi sa pagsiguro nga ang basura ang nahaboy sang insakto.
