Nadiskubrehan sa isa ka rainforest sa Australia ang isa ka insekto nga ginakabig pinakadako kag pinakambug-at nga insekto sa nasambit nga pungsod nga masobra sa isa ka ruler ang kalaba-on.
Ginapatihan nga makit-an sa mga puno kag tanom ang nasambit nga insekto nga may manipis nga lawas kag nagaduag sang green kag brown.
Ginatawag ini nga walking stick ukon stick insect.
Depende sa klase sang species, mahimo ini nga maglaba tubtob sa 12 inches apang ang nadiskubrehan sa isa ka rainforest sa Australia, nagdangat sa kapin 16 inches ang kalaba-on kag nagabug-at sang 44 grams.
Ini sa karun ang naga-uyat sang record sa Australia nga pinakamabug-at nga insekto sa pungsod.
Ginapatihan sang mga eksperto nga evolutionary response ang tuman nga pagdako sini bangod sa matugnaw nga klima sa lugar agud mabuhi ini.
Samtang, makit-an sa isa ka isla sa New Zealand ang may uyat sang world record bilang pinakadako nga insekto nga nagabusong nga Giant Weta o Deinacrida heteracantha, nga kaangay sa tibakla nga nagabug-at sang 71 grams.
