Pagasolohon nalang sang provincial government sang Negros Occidental ang paggasto sa ginapatukod nga Bulk Water Supply Project sang probinsya.
Ini bangud ang probinsya ang indi na magkuha pa sang private investors nga magabulig sa pagdihon sang mga proyekto.
Madumduman nga may yara sang napulo ka mga investors nga nagpahayag nga magainvest sa proyekto.
Apang didto natukiban nga tuman kamahal ang presyo sang tubig kun may yara sang private investors.
Ang katuyuan sang pagdihon sang provincial government sang bulk water supply project ang agud supplyan ang mga Local Government Units.
Sa tion nga may yara sang private investors ang presyo sang tubig ang magadangat sa P24 per cubic meter kun sa diin mabug-at para kunsumidor.
Ini man ang rason sadto kun ngaa wala naghatag sang Resolution of No Objection (RONO) ang Local Government Unit sang Silay sa nasambit nga proyekto bangud kun nakita nga kun madayon tuman kamahal ang tubig.
Apang sa karun ginalantaw nga mahatagan na ang mga ini sang RONO sang Silay City Government.
Sa interview kay Negros Occidental Provincial Administrator Atty. Rayfrando Diaz, prayoridad nga mahatagan sang supply sang tubig ang ciudad sang Silay bilang host City.
Suno kay Diaz, gin-aprubahan na sang Sangguniang Panlalawigan sa ila nga regular session sang nagligad nga Martes ang nabilin nga P314 million sa P520 millon nga kinahanglanon para sa Phase I sang proyekto.
Suno diri, ila na ginatapos ang terms of reference kag ang tanan nga financial kag technical documents agud masuguran na ang bidding process nga ila ginalauman matigayon sa una nga bahin sang Oktubre.
Sa kabug-usan, ang Bulk Water Supply Project ang magabalor sang P1.1 billion nga magahalin sa pondo kag savings sang Provincial Government kag ginalauman makaserbisyo na antes matapos ang termino ni Negros Occidental Governor Eugenio Jose “Bong” Lacson.
Plano nga itanyag ang tubig gikan sa Bulk Water Supply Project sa P14 kada cubic meter.
