Daan nga hiligut-anon ukon old grudge ang ginalantaw nga rason sa pagtiro-patay sa Barangay Tanod sa Purok Dahlia, Brgy Puey, Sagay City, Negros Occidental sang Lunes sang kaagahon.
Ang biktima ang ginkilala nga si Marbelito Opindo, residente sang Purok Dahlia Brgy. Puey, Sagay City.
Sa interview sang Bombo Radyo kay PLt Col Alvimar Flores, hepe sang Sagay City Police Station, ang biktima ang may nagapadayon nga kaso kag naaresto man ini sa kaso nga act of lasciviousness.
Suno kay Flores, may yara na sila sang natumod nga duha ka persons of interest nga posible may kaangtanan sa pagpatay sa biktima.
Suno sa hepe, ang biktima ang naaresto sang October 2024 matapos nga ginserbehan sang warrant of arrest kag nakapiyansa man gilayon.
Suno diri, ginalantaw nga old grudge ang isa sa motibo sa pagpatay sa Barangay Tanod.
Sa karun, nagapadayon ang imbestigasyon sang mga otoridad sa nagluntad nga shooting incident agud matumod ang motibo kag ang mga suspetsado nga responsable sa pagpatay sa biktima.
Madumduman nga nagpadulong sa kapiyestahan sa pihak nga purok si Marbelito kag sang papauli na ini, siya ang ginsundan sang mga suspek kag ginluthang.
Nakadalagan pa sang kapin lima ka metros si Marbelito apang natumba ini bangod sa naagom nga igo sang bala kag ginbawian sang kabuhi.
