Gin-athag sang spokesperson sang Bureau of Jail Management and Penology – Negros Island Region ang mga natumod nga rasun sa pagpatigayon sang noise barrage sang mga persons deprived of liberty (PDL) sa Negros Occidental District Jail.
Nahibaluan nga alas-9:00 sang aga umpisa nga nagsaka sa rooftop sang NODJ ang mga PDLs agud ipanawagan nga pahalinon ang ila Jail Warden nga si Jail Chief Inspector Atty Crisyrel Awe.
Sa interview sang Bombo Radyo Bacolod kay Jail Senior Inspector Juniven Umadhay, sa ila initial investigation, natumod nga ang nagapanguna nga ginareklamo sang PDLs amo ang pag-implementar sang coupon ukon cashless system.
Ini ang madugay na nga napatuman sa iban nga mga jail facilities sa Pilipinas, apang late napatuman sa Negros Occidental nga nasuguran lamang sang nangin Jail Warden si Awe kapin isa pa lamang ka bulan ang nagligad.
Ang tuyo sang coupon system amo ang madula ang paggamit sang kwarta sa sulod sang jail facility nga masami nagahatag sang gahom ukon mas mataas nga impluwensya sa pila ka mga priso gikan sa iban.
Natingala man si Umadhay kun ngaa ini ang ginapamatukan apisar nga ang pagpatuman ang para man sa benepisyo sang kadam-an.
Pahayag sini nga kun magpadala sang kwarta ang mga pamilya, ini ang ginaconvert sa coupon nga magamit sang mga priso, luwas pa sa regular nga pagkaon gikan sa jail facility.
Dugang pa sini nga mamonitor man kun may overpricing sa kooperatiba nga nagabaligya sa sulod, bangod ang coupon system ang gina-audit sang Bureau of Jail Management and Penology – Negros Island Region.
Samtang ang naghatag naman sang alarma sa mga PDLs gani sila ang nagpinsar nga may intimidation ukon maltreatment amo ang pagsuksok sang mga jail personnel kag jail warden sang bullet proof vest kag military helmet sang tinalikdan.
Apang paathag ni Umadhay nga ini ang ginhimo bilang precautionary measure matapos nga may ginluthang nga jail personnel nakaligad nga bulan samtang may-ara man sang naghaboy sang armas-luthang gikan sa gwa pasulod sa jail facility.
Ini man ang rasun nga gin-estrikto ang pagsulod sang bisita, apang paathag ni Umadhay nga ginapahanugutan gihapon ang bisita kag ang pagdala sang pagkaon sa mga PDLs.
