Nanaog na sa pwesto bilang jail warden sang Negros Occidental District Jail si Jail Chief Inspector Crisyrel Awe samtang nagapadayon ang imbestigasyon angot sa ginpatigayon nga noise barrage sang mga person’s deprived of liberty (PDL) sa panawagan nga kakason siya bilang jail warden.
Kahapon, nagpatigayon sang noise barrage ang mga PDL’s bangod sa reklamo nga pag-implementar sang coupon ukon cashless system, pagsuksok sang mga jail personnel kag jail warden sang bullet proof vest kag military helmet nga naga-intimidar sa ila, kag estrikto ng pagpasulod sang bisita.
Bangod sa mga pagbag-o sa NODJ nga wala nila ginakumpormihan, ila ginpanawagan nga islan ang jail warden.
Sa interview sang Bombo Radyo Bacolod kay Jail Senior Inspector Juniven Umadhay, spokesperson sang Bureau of Jail Management and Penology – Negros Island Region, boluntaryo nga nanaog si Jail Chief Inspector Awe agud indi maimpluwensyahan ang imbestigasyon kag mapagwa ang kamatooran angot sa reklamo batok sa iya.
Suno diri, sa karun gin-appoint bilang Officer In Charge si Jail Senior Insp. Raymund Aro bilang bulos kay Jail Chief Insp Awe.
Si Jail Chief Insp Aro amo ang chief of operations sang BJMP-NIR.
Pahayag ni Umadhay may gina-conduct nga imbestigasyon kun matood ang reklamo batok sa anay jail warden kag kun mapatud-am man, siya mahimo madagdagan sang formal charge apang kun indi naman, suno kay Umadhay nagapakita lamang nga wala sang kamatooran ang alegasyon sang mga PDL’s.
