Maga-issue sang show cause order si Bacolod City Mayor Greg Gasataya sa apat ka personnel sang supply and property office sang City Engineers Office may kaangtanan sa nagtig-a nga 4,800 ka bags sang semento sa warehouse sa Brgy Taculing.
Suno sa alkalde, siya ang magapatigayon sang overhauling sa departamento.
Ginaverify paman sini ang data natuhoy sa numero sang mga nagtig-a nga sinako sang semento.
Ginmando naman ni Mayor Greg ang clearing sang warehouse kag ginapasaylo ang tanan nga magamit pa nga sako sang semento sa lain nga warehouse.
Panugyan sini nga magrenta anay sang lain nga warehouse nga mabutangan, agud maseguro kun pila gid ang numero sang mga nagtig-a nga semento.
Luwas diri, ginmando man ni Mayor Greg ang pagsumiter sang status sang tanan nga proyekto sang City Engineers Office sa sulod sang 24 oras.
Ini ginalakipan sang pagbakal sang materyales, mga ginsudlan nga kontrata sa labor ukon pakyaw kasubong man ang mga proyekto nga ginasupervise kag gina-implementar sang City Engineers Office.
Suno kay Mayor Greg, nakabatun ini sang report nga may mga proyekto nga halin pa sang 2022 apang wala gihapon matapos.
Magaconvene man ini sang “disposal committee” nga magatuon sa legal nga pamaagi sa pagdispose sang mga nagtig-a nga semento, kasubong man kun ini ang pwede pa nga mapuslan.
Hulaton ni Mayor Greg ang eksplinasyon sang City Engineers Office bwas kag ini ang iforward sa City Legal Officer para sa nagakaigo nga desisyon.
Pasalig naman sang alkalde nga seguruhon nila nga indi na masulit ang kaangay nga problema.
