Ginapanawagan sang Bacolod City Fire Station ang kooperasyon sang mag-asawa nga Alyas Fritz kag Alyas Sunshine, ang nagarenta sa balay nga ginhalinan sang sunog sa Brgy 27 kaina sang kaagahon.
Madumduman nga 216 ka mga pamalay ang gintupok sang kalayo, sa sunog nga nag-umpisa kapin alas-12:00 sang kaagahon kag napalong pasado alas-3:00 sang kaagahon.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, natumod nga ang origin sang kalayo ang gikan sa ikaduha nga panalgan sang balay nanday Fritz kag Sunshine sa Prk Cheriza 1.
Antes ang sunog, nabatian sang mga pumuluyo nga naga-away ang mag-asawa, apang naanad naman ang mga ini bangod halos adlaw adlaw man nga naga-away ang duha.
Apang paathag sang City Fire Marshal nga sa ila imbestigasyon, ginalantaw nga electrical ignition ang nagtuga sang sunog.
Ini bangod sila ang nakakita sang extension wire nga may nakasaksak nga electric fan kag charger.
Dugang pa nga wala sang kuryente ang balay, gani sila ang nagatapping lamang sa kaigod.
Ginalantaw ni Masip nga mahimo na-overload ang extension ukon indi masarangan sang ila nga ginsaksakan kadakuon sang load.
Ginkahangawa man sang mga kaingod nila bangod antes ang sunog, nagbiya sa balay ang mag-asawa kag ini ang ginkandado.
Bangod sila ang may duha ka magagmay nga kabataan, may mga nagpinsar nga sila ang wala nakagwa, apang ginpasalig man sang fire personnel nga wala sang may nasunog.
Ipaidalom pa nila sa electrical analysis ang narecover nga extension agud matumod gid ang rasun sang sunog.
Sarang naman nga makafile sang kaso sa mag-asawa ang mga nahalitan apang negligence resulting to damage to property lamang kag indi arson bangod wala man ginhungod ang sunog.
Apang matapos ang insidente, wala pa gihapon makapakita ang mag-asawa.
