Nagtukod sang surveillance and apprehension team ang Sangguniang Panlungsod sang ciudad sang Bacolod para ma-address ang pagduging sang mga badjao nga nagapang-abusar kun indi mahatagan sang kwarta.
Sa interview sang Bombo Radyo kay Bacolod City Mayor Greg Gasataya, ang pagduging sang badjao sa ciudad masami nga nagakatabo sa paghilapit sang Masskara festival kag paskwa.
Suno diri, ginakabalaka sini ang alegasyon nga may nagakatabo nga pagpang-harrass kag pagpamahog kun indi sila paghatagan sang kwarta
Suno sa alkalde, alarming man sa karun nga indi lang sa isa ka area nagakatabo ang pagpang-abusar sang mga badjao bangod madamo na gid sila sang nagalibot-libot sa ciudad.
Agud ma-address ang problema may meeting kahapon nga ginpatigayon kaupod ang Department of Social Services and Development, Bacolod City Police Office, City Legal Office, kag yara man sanday Bacolod City Administrator Atty Mark Steven Mayo kag Councilor Israel Salanga, chairperson sang Social Services and Development.
May gintukod nga surveillance and apprehension team nga amo ang magalibot sa ciudad kag madakop sa mga badjao nga nagapang-abuso.
Pahayag ni Gasataya, pasakaan sang kaso ang badjao nga madakpan bangod indi na sini luyag pa nga pabay-an lang ang mga nagapang-abusar.
