Pabor ang presidente sang Bacolod Alliance of Commuters, Operators and Drivers (BACOD) – Manibela sa ginpatigayon nga random drug test sang Land Transportation Office – Negros Island Region upod sa Philippine Drug Enforcement Agency – Negros Island Region kag Highway Patrol Group – Negros Island Region.
Kahapon, apat ka moderniazed kag duha ka traditional jeepney drivers ang nagpositibo sa random drug test sang Oplan Harabas sa Bacolod North Terminal.
Sa interview sang Bombo Radyo Bacolod kay Rudy Catedral, kun tani indi lang ini pagpatigayonon sa tion sang undas bangod hugot sini nga ginakondenar ang pag-usar sang illegal nga druga sang mga drivers.
Suno diri, iya ginkumpirmar nga indi nila miyembro ang traditional jeepney driver nga nagpositibo sa drug test.
Suno pa kay Catedral iya ginasiguro nga indi mahuy-an ang ila grupo amo nga sulit-sulit sini nga ginapa-intindi sa mga miyembro sang BACOD-MANIBELA nga likawan ang pag-usar sang illegal nga druga kag unahon gid ang ila pamilya.
Apang, bisan siya mismo makahambal nga may yara sang ruta sa ciudad nga kalabanan mga adik ang drivers nga kun kaisa nagatalang pa kun diin ang ila ruta.
Pahayag sini, wala sila nagapabor sa proposal sang tinalikdan nga ipadilaum sa drug test ang mga drivers sang public utility vehicle nga sila mismo mabayad, apang ang sa karun nga random drug test sa pagpanguna sang LTO ila hugot nga ginpaboran bangod libre ini kag suno pa sa iya wala sang problema bisan irevoke gilayon ang drivers license sang mga magpositibo sa drug test.
