Gin-athag sang Vatican nga si Hesus lamang ang manluluwas sang kalibutan kag indi si Virgin Mary, suli sa ginapakigbahin sang pila ka mga opisyal sang simbahan.
Sa bag-o nga order nga gin-aprubahan ni Pope Leo XIV, ginmando ni Dicastery for the Doctrine of the Faith sa 1.4 billion Catholic sa bilog nga kalibutan nga indi pagtawgon nga “co-redeemer” si Maria ukon kaupod nga manluluwas sang kalibutan.
Suno sa dokumento, ang paggamit sang titulo nga co-redemprix ang wala nagakaigo kag posible nga magtuga sang confusion sa pagtuo sang mga Kristiyano.
Apisar nga ginakilala sang Catholic Church ang dako nga papel ni Maria sa maragtas sang kaluwasan, si Hesus lamang ang nagluwas sa kalibutan nagikan sa kasal-anan paagi sa iya kamatayon sa krus kag pagkabanhaw.
Madugay na nga ginadebatehan sang mga scholar sang simbahan kun dapat bala nga kabigon si Maria nga kabulig ni Hesus pagluwas sang kalibutan.
Si Pope Francis, nga nagtaliwan sa Abril 2025, ang hugot nga nagpamatok sa ini nga titulo kag gintawag ini nga “foolishness” sang 2019.
