Anum ka bus ang ipadala sang Land Transportation Office – Negros Island Region sa mga Local Government Units nga mahimo tuman nga mahalitan sang bagyo UWAN sa rehiyon.
Sa interview sang Bombo Radyo Bacolod kay LTO-NIR Director Atty Jeck Conlu, indi pa makabalik sa normal operation ang LTO- Bacolod City office, Pontevedra kag La Carlota City bangod wala pa sang kuryente kag mahina ang signal.
Suno diri, luyag sang LTO -NIR nga magbulig sa mga LGUs nga nagakinahanglan sang ila resources sa pagpatigayon sang preemptive evacuations.
Suno kay Conlu, may yara sila sang anum ka bus nga mahimo ipadala sa mga LGUs nga tuman nga maapektohan sang bagyo UWAN para magtransport sang mga evacuees.
Ini agud bisan papaano komportable ang pagbyahe sa mga evacuees sangsa nga itransport sila sakay sa truck.
Dugang pa sini, ang bus nga ila ipadala mahimo man magamit sa pagtransport sa mga pasahero nga nastranded kag madala sila sa safe nga lugar.
Magluwas sa bulig sa transportasyon, ang LTO-NIR may ipanagtag man nga mga foodpacks.
Pasalig ni Conlu, ang LTO-NIR mahatag sang bulig tubtob sa ila masarangan.
