Ginbawian na sang kabuhi alas-11:45 kagab-i ang Barangay Tanod nga nakuryente samtang nagapatigayon sang clearing operation sa Brgy Bata, Bacolod City.
Sa interview sang Bombo Radyo Bacolod kay Punong Barangay Remus Abaring, ang biktima ang ginkilala nga si Weljo Valderama, yara sa 50 ang edad, may duha ka kabataan, kag residente sang Purok Mahimayaon, Brgy Bata, Bacolod City.
Suno sa kapitan, nagmensahe na ini sa pamilya nga maghapit sa Barangay Hall agud ma-estoryahan ang sarang mabulig sang Barangay.
Aminado si Abaring nga siya ang mabasulan bangod ginpatrabaho sini sa clearing operation ang mga Barangay Tanod apisar nga indi nila trabaho.
Apang suno diri, siya ang wala sang nahimo kundi i-augment ang mga Brgy Tanod bangod sa kahalitan sang Bagyo TINO.
Ang mga ini ang ginsugo niya sa pagpanapas sang mga sanga agud indi na mabudlayan ang mga naga-chainsaw.
Suno diri, indi na sini pag ipatandog sa mga Brgy Tanod ang mga kahoy nga may nakasablay nga kuryente nga wala sang personnel sang Negros Electric and Power Corporation nga magaseguro nga off ang power supply.
Ginakasubo sang Punong Barangay ang natabo nga disgrasya.
