Wala pa matumod ang tag-iya sang karabaw nga nabungguan sang motorcycle rider nga napatay sa dalan Araneta sa atubang sang Toyota Motors, Barangay Tangub ciudad sang Bacolod sang Nobyembre 17.
Madumduman samtang nagabiyahe si Noli Barba, 27-anyos, kasado kag residente sang Purok Aning, Barangay Pahanocoy, Bacolod City nabungguan sini ang karabaw nga nagatabok sa dalan.
Ang biktima ang nakaangkon sang samad sa nagkalain-lain nga bahin sang lawas nga nagresulta sang iya kamatayon.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, padayon ang ila nga pagpangita kag paghibalo kun sin-o ang tag-iya sang karbaw nga nabungguan sang biktima.
Suno kay Bonilla, nagasuspetso ang mga ini nga indi nagikan sa lugar ang karbaw nga mahimo nakabuhi lang kag nakalab-ot sa area.
Sa karun nagahulat sila sang feedback agud makilala ang tag-iya sang sapat kag mapasakaan sang nagakaigo nga reklamo.
