Patay ang driver sang motorsiklo matapos sini ginsungay ang buli sang nakapark nga pickup sa Taytay Mambukog, Brgy Zone 16, Talisay City.
Ang biktima ang ginkilala nga si Raffy Rayos, 41 anyos, residente sang Buenavista Subdivision, Brgy Guinhalaran, Talisay City.
Sa interview sang Bombo Radyo Bacolod kay Police Lt Col Alvin Christopher Baybayan, hepe sang Talisay City Police Station, ang biktima ang sakay sa iya Yamaha Sniper 150cc kag nagabyahe gikan sa Bacolod City padulong sa Talisay City.
Ang itom nga pickup ang nakapark naman sa kilid sang dalan sa atubang sang isa ka talyer.
Ginalantaw nga madasig ang dalagan ni Rayos gani nagdasok gid ang motorsiklo sini kag naglabog ang driver.
Apisar nga ini ang nakahelmet, nag-agom gihapon sang patal nga mga samad sa ulo kag nagkalainlain nga bahin sang lawas ang biktima.
Gindala pa ini sa Talisay City Health Center apang gindeklarar nga dead on arrival.
Wala naman sang iban pa nga involved kag ginpahibalo naman nila ang pamilya sang biktima.
