Ginpahayag sang Provincial Explosive Ordnance Disposal and Canine Unit sang Negros Occidental Police Provincial Office nga may yara sang nagakaigo nga kaso para sa mga nagapalapta sang sala nga impormasyon.
Ini angot sa bomb threat nga nabaton sang Western Visayas State University – Himamaylan Campus pasado alas-12:00 sang hapon sang Nobyembre 19 kag Central Philippines State University sa ciudad sang Kabankalan, pasado ala-1:00 kahapon sang kaagahon, Nobyembre 20.
Sa interview sang Bombo Radyo kay Police Captain Alberto Sardua, team leader sang NOCPPO EOD and Canine Unit, kaupod nila sa imbestigasyon ang anti-cybercrime unit agud matrack kun diin nga lugar naghalin ang ginpasa nga bomb threat.
Suno diri, ini agud mamonitor kag masundan kun sin-o ang nagpalapat sang sala nga impormasyon.
Pahayag ni Sardua, sa tion nga may yara sang bomb threat mahimo nga mapanubo sa 50 percent ang threat sa bulig sang buluthuan sa pag-identify kun may yara sang unknown nga bagage nga bag-o pa lamang nila nakit-an sa lugar.
Nagapanawagan sa karun si Sardua sa mga staff, manunudlo kag estudyante sang buluthuan nga mangin responsable sa pag-organisar sa mga gamit agud kun may yara man sang naglain mas mahapos ini manotisyaran kag mapanubo ang tsansa nga may magluntad nga insidente.
SAMTANG….nagapanawagan ang Kabankalan City Police Station sa mga may impormasyon tuhoy sa naghimo sang bomb threat sa Central Philippine State University (CPSU) Main Campus sa Brgy. Camingawan, Kabankalan City nga magkoordinar sa ila.
Sa interview sang Bombo Radyo Bacolod kay Police Captain Sammy Gasataya, deputy chief of Police sang Kabankalan City Police Station, bukas ang ila talatapan sa pagcater kag pagtago sang identity sang makahatag sang impormasyon angot sa naghimo sang pagpamahog.
Panawagan man sini sa may kahimuan sang bomb threat nga untatan na ang ginahimo bangod ini ang wala sang matuga nga maayo, sa baylo nagahatag lamang sang kakugmat kag kahadlok sa mga estudyante.
Ang kapulisan ang nagatrabaho man kaupod sa administrasyon sang eskwelahan kag local government unit angot sa imbestigasyon sa kaso.
