Wala anay sang trabaho kag session sa Senado subong nga Lunes, agud mahatagan sang ligwa ang pagpaninlo kag assessment matapos ang nagluntad nga sunog sa building.
Wala nalakip sa suspension ang mga empleyado nagikan sa security, maintenance, kag general services nga padayon nga nakaduty agud masiguro ang safety kag order sa sulod sang compound.
Nagpasalig si Senate President Vicente “Tito” Sotto III nga wala sang may naguba nga importante nga mga dokumento bangud sa insidente.
Suno sa Bureau of Fire Protection (BFP), nagsugod ang sunog sa ikaduha nga panalgan sang building kag gilayon nga napalong matapos ang masobra isa ka oras nga operasyon sang mga bombero.
Sa una nga report, ginabanta P1.2 million ang balor sang halit sa pila ka mga opisina kag kagamitan.
Nagapadayon sa karun ang imbestigasyon sang BFP kag Senate Sergeant-at-Arms agud matumod ang rason sang sunog.
