Nagahulat pa ang pamunuan sang Bacolod City Water District (BACIWA) sang announcement nagikan sa PrimeWater kag kay Bacolod City Lone District Congressman Alfredo “Albee” Benitez angot sa nabalitaan nga pagtake-over sa nasambit nga water concessionaire.
Sa interview sang Bombo Radyo Bacolod kay Atty. Sonya Verdeflor, Chairman sang Board of the Directors sang BACIWA, ginahulat pa nila ang announcement agud nga mahibaluan man nila kun ano ang ila mangin arrangement sa bag-o nga ownership sang PrimeWater bangud sila ang may existing Joint Venture Agreement (JVA).
Suno kay Verdeflor may mga wala pa nabayaran sa BACIWA ang nasambit nga water concessionaire, gani luyag nila nga makapatigayon sang diskusyon sa pribado nga kompanya.
Suno diri, may yara sila sang ginpadala nga imbetasyon sa PrimeWater para sa joint committee meeting sa Disyembre 18 apang wala man sila sang nabatun nga sabat.
Ginpahayag sa ila nga magapahibalo na lamang kun available ang presidente sang PrimeWater Central Office nga si Bert Fabrique para sa pagsugilanon.
Nakabalay naman sila sang board resolution agud nga mahimuan sang tikang ang indi maayo nga serbisyo sang PrimeWater.
Dugang pa ni Verdeflor nga kun indi pagid mabayran sang PrimeWater ang mga obligasyon sa mga water suppliers kag indi pagid matuman ang mga promisa santo sa ila kontrata sa Joint Venture, magapangayo na sila sang bulig sa Sangguniang Panlungsod agud nga irevoke ang business permit sang PrimeWater.
Apang sa karun nga may bag-o na nga tag-iya, wala pa sila makahibalo kun ano ang mangin arrangements.
