Wala sang nabaton nga impormasyon ukon complaint ang Philippine Coast Guard Station Northern Negros Occidental angot sa ginreport nga nadula nga pasahero nga nagbiyahe halin sa Batangas kag ang final nga destinasyon ang sa ciudad sang Bacolod.
Sa interview sang Bombo Radyo Bacolod kay LTJG John Hofer Olis, spokesperson sang Philippine Coast Guard Station Northern Negros Occidental, may impormasyon nga nagwa angot sa nadula nga pasahero nga si Danilo Villaluz apang indi man nila ini mahimuan sang tikang bangud wala man sang complainant nga nagpalapit sa ila.
Suno kay Olis, nahibaluan nila ang angot diri bangud nga naglapta sa social media ang post sang bata nga nadula ang amay sini kag tubtob sa karun wala nakapauli.
Samtang ang pagkabutang sang nadula nga pasahero ang nakuha na sang iya bata.
Ini ang ginalakipan sang bag, backpack, cellphone kag wallet nga may unod pa nga kwarta.
Ang nadula nga amay ang magapauli kuntani.
Sa impormasyon nga nakuha sang Bombo News Team nakita sa CCTV sang barko nga si Danilo ang nagwa pa sa barko sang nakaabot na ini sa pantalan sang Caticlan.
Padayon man ang koordinasyon sa ginsakyan sini nga bus kun nakasunod ini sang nagbiyahe padulong sa Iloilo patabok sa Bacolod.
Sa pihak nga bahin ginkumpirmar naman sang kongresista sang 5th District sang Negro Occidental nga residente sang Isabela ang nadula nga si Danilo Villaluz.
Sa interview sang Bombo Radyo Bacolod kay Negros Occidental 5th District Congressman Atty. Dino Yulo, nabaton na sini ang impormasyon angot sa pagkadula sang nasambit nga persona.
Suno kay Congressman Yulo, ang pamilya Villaluz ang residente sang Barangay Sicatuna, Isabela.
Suno sa kongresista, nagpauli si Danilo agud nga bisitahon ang naospital sini nga anak nga una naman nga nagpangayo sang bulig sa opisina sini.
Sa karun padayon pa ang pagfollow-up sang kongresista agud mahibaluan kun ano gid ang natabo antes ang pagkadula sang nasambit nga persona.
