Padayon pa ang imbestigasyon sang mga kapulisan sang Kabankalan City Police Station sa pagtiro patay sa isa ka babayi sang duha ka mga wala makilal-an nga armado nga lalaki sa Brgy. Camansi, Kabankalan City sang Disyembre 20 sang udto.
Ginkilala ang biktima kay Virginia Abustad, kasado, pumuluyo sang Hacienda Sta Isabel sa nasambit nga Barangay kag empleyado sang Quary.
Sa interview sang Bombo Radyo Bacolod kay Police Lt Col. Roberto Indiape, hepe sang Kabankalan City Police Station, nagatalikod ang biktima sang hinali lang nga gintiro sang ginapahayag duha ka persona.
Nakaagom ini sang igo sang bala sa dalom sang ilok kag ulo.
Suno kay Indiape, madugay na nga naga-manage sang quarry operation sa nasambit nga lugar.
Nakarecover sa lugar ang pito ka fired cartridges sang calibre .45; isa ka slug sang calibre .45 kag isa ka live ammunition sang calibre .45.
Suno sa hepe may isa ka witness nga positibo nga nagtumod sa isa ka suspetsado paagi sa ginpakita nga litrato sa rouges gallery.
Ginalantaw sang mga kapulisan nga ang may kahimuan sang krimen amo ang mga katapo sang makawala nga grupo.
Padayon man sang mga ini nga gina-validate pa sa karun sang mga kapulisan ang mga nagasulod sa ila nga impormasyon.
Nagpanawagan man ini sa mga pumuluyo nga nakawitness sa pagpatay sa biktima nga makig-angot lamang Kabankalan City Police Station agud nga mabuligan sa pagsolbar ang kaso sini.
