Gin-ako sang rebelde nga New People’s Army (NPA) nga sila ang nagtiro patay sa quarry manager sa Brgy. Camansi, Kabankalan City sang Disyembre 20 sang udto.
Ginkilala ang biktima kay Virginia Abustad, kasado, pumuluyo sang Hacienda Sta Isabel sa nasambit nga Barangay kag empleyado sang Quary.
Ang biktima ang isa man ka Barangay Tanod sa ila nga lugar.
Sa interview sang Bombo Radyo Bacolod kay Police Lt Col. Roberto Indiape, hepe sang Kabankalan City Police Station, nagpagwa ang NPA sang press release nga sila ang nagpatay sa biktima.
Suno kay Indiape, ginpahayag sang NPA nga ginpatay nila sa Abustad bangod ini ang asset sang gobyerno kag ini ang naggiya sa tropa sang militar sa mga engkwentro nga nagtuga sang kamatayon sang pila ka rebelde.
Pahayag sang hepe, nga may nakakita kag nakakilala sa isa sa mga suspek kag natumod nga ini ang miyembro sang Communist Terrorist Group (CTG), base man sa litrato nga ginpakita sang mga kapulisan sa rouges gallery.
Ginakumpleto na ang mga papeles agud nga mapasakaan sang kaso ang suspek.
Nagpanugyan man si Indiape sa mga residente nga kun may makita nga grupo sang mga tawo nga indi nila kilala, magtawag gilayon sa mga kapulisan ukon sa malapit nga unit sang Philippine Army agud mavalidate agud malikawan ang pagluntad sang krimen.
