Nabaton na sang mga empleyado sang Negros Occidental Provincial Government ang tanan nga mga bonuses.
Sa interview kay Negros Occidental Provincial Administrator Atty. Rayfrando Diaz, ginakalipay sini ang pag-anunsyar nga mas temprano subong nga tuig ang pagpanagtag sang mga benefits para sa regular, Contract of Service, Casual kag Job Orders.
Suno kay Diaz, ang gratuity pay nga P7,000 sang JOs kag COs ang na-release na kag nadownload sa ila nga ATMs.
Suno sa Provincial Administrator makita kag mabatyagan nagid ang Christmas spirit sa kapitolyo.
Ginbuksan naman sang probinsya ang payroll kag nagasige na sa pagpanagtag para sa Productivity Enhancement Incentive (PEI) nga P5000 sa qualified nga empleyado.
Suno diri ang kabug-usan nga additional bonuses sang mga regular kag casual employees ang nagdangat sa P55,000 nga ginalakipan sang CNA nga P30,000; SRI nga P20,000 kag PEI nga P5000.
Na-release naman sa mga empleyado sa Bacolod City Government ang Collective Negotiation Agreement (CNA) kag Service Recognition Incentive (SRI) samtang ang Gratuity pay ang gina-amat amat na gina-release.
Sa interview kay Bacolod City Administrator Atty. Mark Mayo nga sa CNA kalabanan kun indi man tanan ang nakabaton na samtang ang gratuity pay ang padayon ang proseso bangud nakadepende ini sa tagsa ka opisina.
