Piloto sang eroplano, ginlock ang kaugalingon sa cockpit kag nagbalibad sa pagtake-off bangod wala mabayaran sang sweldo

Ano ayhan ang imo nga himuon kun sa imo nga pagbaka-baka indi ka maswelduhan?

Sa Mexico, isa ka piloto ang nagpamalibad nga mag-take off kag ginbarikadahan ang iya kaugalingon sa cockpit sang eroplano bilang pagprotesta sa wala nabayaran nga sweldo.

Sa atubang sang madamo nga pasahero nga yara na sa sulod sang eroplano, ginpahayag sang piloto nga indi sila mag-take off kun wala sila nabayran.

Gina-alegar sang piloto nga wala siya naswelduhan sa sulod sang lima ka bulan kag wala nabayran ang iya gingasto sa pagbyahe.

Suno naman sa Benito Juarez International Airport, gina-imbestigaran na sang civil aviation authorities ang insidente.

Nagagwa sa report nga ginpriso ang piloto samtang ginpang-evacuate ang mga pasahero.