Ginpasalamatan sang station commander sang Bacolod Police Station 7 ang pagreport sang mga pumuluyo sa kawatan sa Barangay Alijis, Bacolod City.
Madumduman nga dakop sa akto ang 34 anyos nga notorious nga kawatan matapos manulod sang balay sa Block 10, Lot 25 kag 26, DC 3, RPHS, Brgy Alijis, Bacolod City alas-6:00 kahapon sang aga.
Ang kawatan ang ginkilala nga si Mark Angelo Lamis alyas Nonoy, 34 anyos, wala sang trabaho kag residente sa Block 18, Lot 24, Landville 3 Subdivision, Brgy Mansilingan, Bacolod City.
Ginapahayag nga ginhulat lamang ni Lamis nga makagwa ang tag-iya sang balay nga si John Michael Carmona, 35 anyos, single, overseas Filipino worker, kag ginsulod sini ang balay paagi sa pagtaklas sa pader.
Ginpudpod man sini ang mga buka nga botelya nga ginhamtang sa babaw sang pader agud makasulod.
Apang may-ara sang nakakita sa kawatan, kun sa diin nagpakilala ini nga siya ang caretaker sang balay.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, basta ang mga pumuluyo ang magareport madakpan gid ang kawatan.
Suno kay Santillan, ang nasambit nga persona ang Barangay Anti-Drug Abuse Council (BADAC) listed.
Suno diri, gina-verify pa sang mga kapulisan kun taga diin ang nadakpan bangud ini ang indi residente sang Barangay Alijis.
Nagpanawagan man ang station commander nga kun sin-o man ang nabiktima sang kawatan makig-angot lamang sa Bacolod Police Station 7 agud nga mapasakaan ini sang dugang nga reklamo.
