Patay ang 20-anyos nga lalaki matapos malumos sa suba sa Hda. Santol, Brgy. Matab-ang, Talisay City pasado alas-3:00 kahapon sang hapon, December 29.
Ginkilala ang biktima nga si Roniel Melocoton, residente sang Purok Santo Domingo, Brgy. Banago, Bacolod City.
Sa interview sang Bombo Radyo Bacolod kay Police Lt. Ramon Juablar, Deputy Chief of Police sang Talisay City Police Station, ang biktima ang may kaupod nga apat ka indibidwal kag sila nag nagpaligo humalin alas-11:00 sang aga.
Suno kay Juablar, ang biktima ang nakadanlog sa bato kag nahulog sa madalom nga bahin sang suba.
Gintinguhaan man sang iya mga abyan nga ma-rescue ang biktima bangud indi ini kabalo maglangoy apang wala na matabangan pa.
Pasado alas-3:00 sang hapon natabo ang insidente kag masobra isa ka oras pa antes narekober ang lawas sang biktima.
Wala naman sang nakita nga foul play sa insidente.
