Yara sa kritikal nga kondisyon ang driver sang motorsiko nga nagdasok sa likod sang wing van sa Burgos Extension, atubang San Miguel Brewery, Barangay Granada kahapon sang kaagahon, December 30, 2025.
Sa interview sang Bombo Radyo Bacolod kay Police Major Elmer Bonilla, Chief sang Bacolod City Police Office-Traffic Enforcement Unit, sa imbestigasyon sang traffic investigator on case, ang tatlo ka wing van ang nagahulat nga makargahan sang beer nga pagadal-on sa Mindoro sang wala namulalungan sang driver sang motorsiklo gani nakabunggo ini sa likod kag nagdasok sa dalum sang van.
Suno kay Bonilla, nagwa man sa imbestigasyon nga kargado sang makahulubog nga ilimnon ang driver sang motorsiklo.
Sa karun nagpadulong na sa police station ang pamilya sang driver sang motorsiklo para sa settlement.
Ginalantaw nga ang tag-iya na sang salakyan ang magasabat sang galastuhon sa pagpabulong sa biktima.
